Der Wind duet d Bletter ummewiirble,
am blaue Himmel dien d Drache zwiirble,
d Spinnbubbele glänze wie Fylygraan im Haag
und s Rootbrüschtli zwitscheret der lieblang Daag.

D Öpfel und Kürbis lüüchten in Harmonyy,
au im Wald heerscht e Faarbesinfonyy.

S wird kelter und scho isch d Herbschtmäss doo,
d Keschtenemänner und Selmeli sinn au wiider koo.
Men isst Kääs- und Roosekiechli mit Gnuss,
s git wiider Suurgrutt, neie Siessen und Nuss.
Im Wald schmeggt s no Herbscht under de Buechen
und Danne

und s schmeggt au guet dehaim in der Pfanne.

Aaber uffsmool deggt e diggi Nääbelsubben alles zue,

d Vöögel sinn still, s isch en unhaimligi Rue.
Numme d Gwaagge kräächzen in de Baim;
i bi muuderig und blyb dehaim.

Im Wald go spaziere duet mi nimm freue,
die verschimmlete Milchling dien mi nit reue .

Aaber zem Glügg, und als Höhepunggt wien i main,
kunnt jo no der Schlussbummel vom Pilzverain.
E Höhepunggt isch denn immer d Pilzuusstellig uff em Tisch

was im Novämber wien e glai Wunder isch.
E Wunder isch au- i bii scho e bitz gschlaucht -
wenn au der René wiider uus em Wald uffdaucht .

Me gniesst s, an der Weermi z sitze mit eme volle Buuch -
dass me doo vyl Pilzerladyyn ghöört, isch so der Bruuch.
Im Verlauf vom Oobe, me dringgt nit numme Coca-Cola,
verrootet mer der Hans s Ghaimnis vom Raizker und em Gorgonzola.

Der Helgo duet is vo Mischtlen und, näbscht andere Gschichte,

au vom geniaale Recycling vo de Milchgugge brichte.
D Voordrääg vom Bruno und vom Markus bringen is zem Stuune,
bin ere Faart ins Elsass macht is au s Elsässer Picnic gueti Luune.
Au d Uusstellig irn Botanische Gaarte isch wiider e Hit,
bi andere Exkursioone kaan i laider nit immer mit.
Aaber de Pilz, dääne kurioose Gwäggs, muess me danggbaar syy

und si reschpeggtiere, was miecht au der Kurt und syni Kolleege,
wenn me nümm könnt mikroskopiere?

Zem Schluss für die leerryychen und gmietlige Stunde härzlige Dangg;

Machet wyter esoo und wärdet nit grangg;
Bim Pilzsueche erläbt me vyl schööni Momänt -
vilicht findet me jo au emool e Kassier und e neue Presidänt.

I wünsch euch e guete Winter und Glügg no vyyl mee
und i freu mi, wenni euch s näggscht Joor,

wenn s herbschtelet, wiider gsee.

Pilz jooruus - jooryy

Gedicht von Hilda Jauslin 

Kuum gseet me Roone- und Lungegrut im Wald
sait der René: "Jetz kömme denn d Morchle scho bald!"
Mer suechen immer wiider, luegen in allnen Egge -
waiss der Gugger, wo die sich verstegge!
Au d Merz-Ellerling, wo doch anderi schynts finde,
dien, wenn mir kömme, vom Aerdboode verschwinde.
Woo me friener vyyl Pilz gfunde hett suscht,
isch jetz nüt umme. S isch wirgglig e Fruscht!
Der ganz Summer simmer im Wald umegirrt;
"s isch aifach z drogge, "sait der René verwirrt.
Ych stolperen über d Brombeeri und die düüre Stägge -
im Korb han i nüt, aber am Buuch e baar Zägge!
Au im Schwarzwald simmer e baarmool gweese,
aber s isch au döört nüt gsii, usser de Speese.
S Pilzle isch a vyylsytigs Hobby, daas muess me saage,
au über fäälendi Beweegig kaa me nit klaage.
Me laufft kylometerwyt ohni s z mergge,
eerscht no vier Stund findsch, de miessisch di stergge.
Bisch richtig schlapp, hesch e miede Fuess
und s Blööden isch, ass men am Schluss no s Auti sueche muess.

Zem Glügg git s der Pilzverein, dört kame viel lehre

(und, wenn s weenig Pilz het, in der Spaaleburg yykeere).

E ghaimnisvolli Wisseschaft isch d Mykologie;
d Pilz hänn e verborge Lääbe voll Räätsel und Magie,

Der aint verbringt sy Zyt bim mikroskopiere,
der ander duet lieber fotographiere.

Der aint het Freud am untersueche und seziere,
der ander duet die ladyynische Nämme studiere.

AinsuechtsyniPilzuffemGottsagger imSchatte

und anderi pilgeren uff d Juuramatte.
Ob Täubling, Porling, Rasling oder Bovist,
s het e jeede Pilz sy Spezialist.

Aaber mer wänn au die nit vergässe,
wo ganz aifach gärn e Pilzschnitten ässe.

Aber ändlig git s denn im Herbscht emool gnueg Rääge,

für der Wald und d Pilz, isch das e Sääge.
Plötzlig spriessts und waggsts an allnen Egge,
me kunnt nit nooch mit luegen und entdegge.

"Die vyyle Fliegepilz, s gseet uus wie im Määrli!"
"Und hesch döört dää Staipilz gsee, dä prächtig Käärli!"

Der Juubel und d Begaischterig sinn grooss,
ändlig isch im Wald öbbis loos.

D Pilzkontrolleur dien scho bald alli Händ verwäärfe:
"Waas die wiider alles bringe, daas bruucht denn Näärve!"
S git jeede Daag Pilz, zem kochen und zem dööre.
"Jetz längt s denn!” saag i, aber daas duet der René nit stööre.
Au für d Pilzuusstellig muess är sammle, s Zyyl syg 500 Aarte;
e Häxering waggst jetz sogaar im Botanische Gaarte.
Au bi miir im Gaarte waggse d Pilz, si zwänge sich uus allne Fuege;

aargwöönischdueni zoobe myni Zeechenaaluege.

Uff der Exkursion mit em Bruno kaa me nomool stuune;

d Körb sinn bald voll, s sinn alli gueter Luune.
E farbige Wald graaglet voll Pilz hämmer gsee,
d Natuur macht is e wunderbaar Herbstbouqet.

Am Schlussbummel lyt mänggmool scho Schnee uff em Holz,
"s letscht Joor hämmer no 100 Arte gfunde,"

schrybt dr Ruedi voll Stolz."

Jedefalls kaa me denn nomool gmietlig zämmehogge;
bim Pilzlerladyyn droggnen au die fiechte Sogge.

Dernoo keert aber Rue yy in Fäld und Wald

und denn kunnt jo au dWienacht schobald.
S duet schneye, denn danzt der Vogel Gryff durab uff em Ryy

und noo der Fasnacht isch au dää Winter verbyy.
S wird wiider weermer, s het scho Hemliglunggi im Wald
und der René sait: "Jetz kömme d Moorchle denn bald!" 

Es isch z drogge!

Gedicht von Hilda Jauslin 

Bild: Psilocybe chionophila

Was isch numme mit däm Wätter loos?!
Me stöönt und klöönt, s Gejoomer isch grooss.

E soone Hitz, daas macht aim schlapp,
und s Wasser wird jetz denn no knapp!
E Sauna-Bsuech kaa aim nümm logge -
s isch aifach z haiss und eerscht no z drogge!

Gseesch kaini Pilz, kaasch stundelang lauffe
und d Aierschwümm han i miessen in der Migros kauffe.

Der Pilzkontrollör het syni Rue,
er wartet uff Rääge, er het nüt z due.
Es jagt en jetz denn us de Sogge:
"Es isch nüt loos, s isch aifach z drogge!"

No nie isch so haiss gsii, solang me sich bsinne kaa,

me maint jo bald, me syg in Afrika.
Au am Määntig-Zoobe, o jeeminee,
kaasch nummen e baar verrääbleti Schwindling gsee.

Kaasch graadsoguet in d Baiz go hogge

und ain go zie - es isch halt z drogge!

Aber an der Pilzuusstellig muess i stuune:
E soovyyl Pilz! Doo besseret mi Luune.
E soone Uuswaal! I bii ganz bedroffe,
iich haa nämmlig numme Hallimasch aadroffe.-
Jetz hoff i, s näggscht Joor wurd is wiider in Wald uuse logge,

s syg immer ideals Pilzwätter - und niemee esoo drogge! 

Das kaibe Wätter: Nie isch s, wie s sott syy,
bald het s jo kai Wasser me im Ryy.
Zwoor isch s immer schöön, me sott nit klaage –

aber s het niene Pilz, das schloot aim uff der Maage.

In Wald duet s dy scho lang nümm logge,
s het niene nüt, s isch aifach z drogge.
Doo kaasch lang sueche und wyt lauffe uff Schueschters Rappe,

wenn aim die Pinguin no die drei letschte Pilz ewägg schnappe! 

ES HERBSCHTELET

Gedicht von Hilda Jauslin 

Bild: Lycoperdon perlatum

Bild: Phaeomarasmius erinaceus

Bild: Omphalotus illudens

Bild: Ramaria pallida

Bild: Phaeolus padiceus

Bild: Stereum subtomentosum

Bild: Resupinatus applicatus

Bild: Strobilomyces strobilaceus

Bild: Mycena radicifera

Bild: Omphalina discorosea

Bild: Mycena floridula